You are currently viewing Дама со девет камења

Дама со девет камења

Ве поканаме на отворањето на самостојна изложба „Дама со девет камења“, проект на Иванчо Талевски во соработка со Васко Дуковски, на 3 јули во 20:00 часот, во Нова сцена при НУ Центар за култура – Битола.
На 4 јули во 19:00 часот следува предавање и промоција на книгата која ја анализира состојбата околу изгубените цртежи на Марко Цепенков и патешествието на овој проект. Повелете!
„Дама со девет камења“ е истражувачки мултимедијален изложбен проект кој преку имагинативен разговор оддава важност и го комплицира значењето на изгубените цртежи на еминентниот собирач на народно творештво, Марко Цепенков. Преку цртеж, графика, проекции и звук, проектот го елаборира и го продлабочува поимувањето на минатото како материјал, со цел да евоцира прашања околу индивидуалната и колективната меморија, историја и припадност, нивното бележење, опстојување и бришење. Цртежот во овој изложбен проект се третира како јазик кој фигурира како кревок опис при бележењето и интерпретацијата на историските и општествените процеси.
Исклучителниот музичар и композитор, Васко Дуковски, кој живее и работи во Шангај, преку свои исцртани музички нотации базирани врз избрани цртежи од Цепенков ќе учествува на изложбата.